रेसम सापकोटाको तिज गित “नक्कले पोइ” ले गर्यो खाडीका नारीको अपमान (पत्र सहित)

श्रीमान् रेसम सापकोटा तथा मञ्जु गुरुङ ज्यु                                 मिति, जुलाई ०८-२०२०

तरेली सङ्गीत कुञ्ज

काठमाडौँ नेपाल l

बिषय:- खाडीका चेलीको अपमान सम्बन्धमा l

प्रस्तुत विषयमा विश्व यति बेला कोरोनाका कारण आजित छ यस्तो अवस्थामा दुखिजलो गरेर तपाइको टिमले एउटा साङ्गीतिक कोसेली तयार गरेछ र तरेली सङ्गीत कुञ्जको अफिसियल युट्युब च्यानलबाट असार २२ गते बजारमा आएछ “नक्कले पोइ” l उक्त गीतको भिडियो हेर्ने मौका पाए l तपाईका हरेक सिर्जना प्रत्यक्ष जनजीवन सँग सम्बन्ध राख्ने र सन्देश दिने हुन्छन् तर प्रस्तुत गीतमा कथा सार बस्तु यथार्थपरक हुँदा हुँदै पनि केही कुराहरूले खाडीमा काम गर्ने नारी माथि अपमान गरेको महसुस गरेको छु l

म कतारमा कार्यरत छु l यो खाडीलाई सरकार देखी सबै तह तप्काले विभिन्न दृष्टिकोणबाट हेप्ने गरेको छ । त्यसैमाथि यहाँ कार्यरत महिला भन्ने बित्तिकै "खराब चरित्र" की भनेर पहिला जज गर्ने सज्जनहरू यही पाइन्छन् जो अति दर्दनाक छ । नेपालमा तिजको माहौल छ तिज गीत वेदनाकै हुनु पर्दछ । चेलीका दुख नै तिजका गीतको मर्म हो l

सारा नेपालीलाई थाह छ खाडीमा अप्ठ्यारो अवस्थामा रहेका कतिपय चेलीहरू नेपाल फर्कदॉ "गर्भवती" रहेको समाचार बाहिरिए पछि सञ्जालका बौद्दिकहरु "अन्तर्राष्ट्रिय भान्जा/भान्जी"  लिएर नेपाल उडे भन्दै आफ्ना चेलीको मजाक उडाउन कतै कुनै कसुर छोडेनन् जुन तपाइले पनि पक्कै सञ्चार माध्यममा देख्नु भएको होला l

तपाईँ जत्तिको बौद्धिक व्यक्तिले "नक्कले पोइ" तिज गीतको अन्तरामा कतार गएकी श्रीमतीलाई "महिना दिन भो गा को बल्ल किन गर्छ्यौ हतार, आइमाईलाई त चिट्ठा हो रे साउदी कतार" भनेर गाउनु भएको छ l पटक पटक सोचेर बुझेर सकारात्मक बनेर हेर्दा पनि र तपाइले गीतमा प्रस्तुत गरेको कथा बस्तु अनुसार यो अन्तराको मर्म तब तक खुल्दैन जब तक तपाइले "दुख भन्ने हुन्न अरे साहुलाई सके समाउन, सजिलो छ आइमाईलाई त्यहाँ पैसो कमाउन" भनेर गाउनु हुँदैन l

आदरणीय सापकोटा तथा गुरुङ जी तपाईँलाई जानकारी छ कि नै तपाइको यो गीतको अधिकास भिउ पनि अरबेले हेरेर बढेको हो l तपाईँ जत्तिको दिग्गज कलाकारबाट यति गए गुज्रेको गीतको लेखन र श्र्ब्यद्रिस्य हुन्छ भनेर कल्पना गरेको थिइन l  सापकोटा जी महिलालाई आइमाई भन्न समेत कानुनले वर्जित गरेको छ । त्यसै माथि कुन दृष्टिकोणबाट बुझ्यो भने साउदी कतार चिट्ठा हो आइमाईको लागी ??  भिडियो मा झैँ तपॉईले तपॉईको श्रीमती/दिदी बहिनी लाई कतार पठाएर “साहुलाई खुसी पार” भन्न सक्नु हुन्छ ?

तपॉईको मतलब के हो ? भिडियो र गीतको कथा अनुसार तपॉईले श्रीमतीलाई पर पुरुषसँग सम्बन्ध बनाउन दबाब दिएको देखाइएको छ जुन पात्रले कथामा बहिष्कार सम्म गरेकी छन् र जबर्जस्ति गर्नेलाई प्रहार गर्दै नेपाल फिरेकी छिन l महिला लाई इज्जत गर्न सक्नु हुन्न भने गीत मार्फत बदनामी गर्ने अधिकार तपाइँहरुलाई कसले दियो ?  यो खाडीको ५० डिग्रीमा काम गरेर पसिनाले पैसा साट्नेहरूलाई तपाईँको गीत ले गरेको अपमानको क्षतिपूर्ति भर्न सक्नु हुन्छ ?

“धन कमाउन गएकी छेउ आउँदा सिन्दूर सम्झिनु, नत्र यता बिर्सिदिनु उतै मन दिनु” यो कस्तो खालको श्रमको दबाब हो तपाइको गीतमा ? तपाईँ द्वयले सकलन  गर्नु भएको गीतको त्रुटिलाई यथा सक्य सच्चाउन तथा कुन अर्थ र आशयमा साउदी कतार आइमाईको लागि चिट्ठा हो खुलस्त पारिदिन हुन् सविनय अनुरोध गर्दछु l खाडीमा काम गर्ने महिलाको अपमान गर्ने अधिकार तपाईँलाई नभएको पुन जानकारी गराउँदै तपाइको गीतमा एउटा डीस लाइक गर्दै मैले बहिष्कार गरेको जानकारी गराउँदछु l

(अरबको एक मजदुर:-  तिलु शर्मा पौडेल )